Sensus Agríkola Sei Hala'o Iha Timor-Leste Hahú 12 Agustu 2019

Dili, 24 Jullu 2019, Ministru Agrikultura no peskas Joaquim Martins, akompaña husi Sekretáriu Jerál MAP, Prezidente Statistika, Kuarta-Feira ne'e entrega sertifikadu Treinamentu ba Treinador Sensus Agríkola iha Salaun Kristal Balide Dili.

Iha tempu hanesan ministru hateten katak Sensus Agríkola sei hala'o iha Timor-Leste hahú husi loron 12 Agustu 2019.

“Sensus ne'e importante tebe-tebes ba iha Timor-Leste tamba foin halao ba dahuluk depois ita nia Independensia. Durante ne'e ita iha deit mak sensus uma kain nian, agora sensus ida ne'e ba iha sensus agrikola ba iha Timor-Leste. Esperansa bot tebe-tebes ho rezultadu ne'ebe mak iha ita uza fila fali rezultadu ne'e hodi halo planeamentu ba programa ne'ebe mak diak ba Agrikultór sira”.

“Husu ba Agrikultor to'os nain no natar nain sira, ne'ebé mak hakiak karau, hakiak fahi, hakiak Manu, no ikan, atu nune'e bele kopera ho diak tamba ita bo’ot sira nia informasaun importante tebe-tebes para bele halo planu ne'ebe diak ba futuru Agrikultura iha Timor-Leste nian”.

Ministru fó parabéns ba partisipante sira tamba bele tuir treinamentu durante loron ualu nia laran, nune'e ba oin bele sai fali treinador hodi fó fali treinamentu ba enumeradór no supervaizór hamutuk 2.584 iha munisípiu hotu inklui Rejiaun Administrativu Espesiál Oekusi Ambeno (RAEOA).

Ministru husu mos ba autoridade Munisipál, autoridade lokál husi aldeia to suko atu servisu hamutuk ho enumerador sira hodi fó dadus ho lolos apoiu masimu ba sensus agrikola para sira bele hala'o ho diak.

Fonte: Mídia Ministério da Agricultura e Pescas (MAP)

Notísia Hotu-Hotu >