Anin Ho Velosidade Bo’ot Sei Akontese Entre Loron 10 To’o 12 Agostu 2019

Díli, 08 Agostu 2019 - Ministériu Transporte no Komunikasaun (MTK) liu husi Diresaun Nasionál Meteorologia e Geofísica (DNMG) alerta ba populasaun iha teritóriu nasionál atu toma atensaun ba anin ho velosidade makas ne´ebé mak sei akontese derepente, ne´ebé previstu atu akontese entre loron 10 to´o 12 fulan Agostu 2019.

DNMG husu ba populasaun tomak atu toma atensaun nafatin wainhira halo viajen ruma tamba previzaun hatudu katak rajada husi anin ne´e rasik sei maka´as iha área sira hanesan Manatuto, Ainaro, Aileu, Maliana no mós Illa Atauro.

Tuir DNMG nia previstu katak eventual ne’e akontese tamba hetan influensia husi pozisaun sistema alta presaun ne’ebé mak lokaliza iha setór sudeste husi Austrália no eventu ne’e mosu tamba iha diferensia presaun entre rejiaun Austrália no Ásia.

Iha previzaun katak valor presaun iha Austrália sei varia entre 1030 to´o 1032 hPa no rejiaun Asia nia valor presaun sei varia entre 1012 to´o 1018 hPa.

Fonte: Mídia Direção Nacional Meteorologia e Geofísica (DNMG-MTC)

Notísia Hotu-Hotu >