Mensajen Prezidente Repúblika Ba Komunidade Muzulmana Timoroan Iha Loron Idul Adha

11 Agostu 2019,
Ho laran ksolok tebetebes mak Prezidente Repúblika asosia ho maun-bin-alin sira ne’ebé halibur ohin iha Meskita Dili hodi selebra Idul Adha nu’udar eventu ida ne’ebé fó-hanoin espíritu umanu murak ida: katak ita ema tenke tau matan ba malu.

Prezidente Repúblika fó mós kontributu kiik ida atu ajuda hametin espíritu ida ne’e.

Iha loron-ohin, maun-bin-alin musulmanu sira lolo bikan ba malu no lolo mós bikan ba fiar-nain sira seluk.

Liuhosi eventu sira hanesan ne’e, ita haree ba malu nu’udar ema no nu’udar mós membru pertense ba família boot ida, moris hamutuk iha uma-kain ida de’it: Timor-Leste.

Unidade ita-nian hametin ho sentimentu katak ita hotu timoroan de’it. Relijiaun ka fiar oinseluk la haketak ita maibé hariku ita, nu’udar Povu no Nasaun.

Hakoak boot ba maun-bin-alin musulmanu sira.
Hamutuk ita tanen Timor-Leste.

Franscisco Guterres Lú Olo
Prezidente Repúblika

Fonte: Mídia Gabinete Conjuge do PR

Notísia Hotu-Hotu >