Amu Locateli Husu MOP Atu Envolve Formandu Sentru Formasaun Fatumaca Iha Konstrusaun Estrada Baucau-Venilale

Fatumaka, 09 Agostu 2019 - Ministru Obras Públikas (MOP), Salvador Pires, halo vizita ba Dom Bosco Fatumaka, munisípiu Baukau hasoru malu ho Amu Eligio Locateli, hodi ko'alia kona-ba nesesidade infraestrutura nian hafoin halo lansamentu fatuk dahuluk ba estrada nasionál trosu Baucau-Viqueque iha Postu Administrativu Venilale.

Iha sorumutuk ne'e Amu Locateli husu ba Ministru atu bele involve formandu sira Sentru Formasaun Ir. Carlos Gamba Fatumaka iha konstrusaun estrada nasionál trosu Baukau-Venilale.

"Amu Locateli, ami ko'alia kona-ba nesesidade infraestrutura ne'ebé mak liuhosi Banku Dezenvolvimentu Aziátiku (ADB), MOP ajuda estabelese ona liña koneksaun bee-moos. Amu mós husu se bele husi prosesu konstrusaun trosu Baucau-Venilale bele involve estudante oan sira ne'ebé iha Colégio Fatumaca ne'ebé mak foti kursu kona-ba konstrusaun atu prátika iha ne'eba." Ministru haktuir.

Ho solisitasaun ne'e, Ministru ko'alia ona ho kontratór no reprezentante embaixada Xina atu fó hanoin ba kontratór, inklui ADB atu hanoin no akomoda solisitasaun amu Locateli nian.

Colégio Dom Bosco Fatumaka hanesan instituisaun ida importante tebes ne'ebé kontribui barak ona iha tempu rezisténsia, produs rekursu umanus sira ne'ebé mesak ho kualidade lider de'it. Balun uluk ministru, vise-ministru, inklui Vise MOP VIII Governu Konstitusionál, Nicolau Lino F. Belo ne’ebé mós graduadu husi Fatumaka. Tanba ne'e, ho solisitasaun amu Locateli nian ne'e atu akomoda liuhosi koordenasaun ho kontratór ou inplementadór husi trosu Baukau-Venilale.

Fonte: Mídia Ministério das Obras Pública (MOP)

Notísia Hotu-Hotu >