Sivitas Akadémika UNTL Hamutuk 326 Simu Sakramentu Krisma Iha Igreja Katedrál

Díli, 13 agostu 2019 - Universidade Nacional Timor Lorosa’e (UNTL), Proreitoria ba Asuntu Provedoria no Akonsellamentu (PRAPA) implementa programa pastorál universidade nian hamutuk ho Dioseze Díli, hodi realiza Sakramentu Krisma iha 10 Agostu, ba sivitas akadémika (estudante, dosente no funsionáriu tékniku administrativu) hamutuk nain 326, iha Katedrál Díli.

Reprezentante Reitór UNTL, Proreitora PRAPA, Teresa Madeira ho esperansa katak liuhusi Sacramento Crisma bele haforsa sivitas akadémika sira-nia valór kristaun.

“Ita-nia krizmandu sira ne’ebé ohin loron ida hafoun sira-nia fiar hanesan Amu Papa nia menzajen katak joven nu’udar masin no misionáriu ba rai ida ne’e hahú husi joven ba joven no ba sosiedade,” dehan Proreitoria Teresa.

Teresa agradese ba kolaborasaun husi Dioseze Díli nian, Amu-Pároco Katedrál nian no apoiu tomak husi universidade nian nomós Amu Kapelaun Padre Nivio Correia, inklui krizmandu sira hotu.

Bispo Dioseze Díli, Dom Virgilio do Carmo da Silva, SDB, apresia programa PRAPA-UNTL nian ne’ebé preokupa matenek isin nian nomós joven sira-nia vida espirituál bazeia ba Ano da Juventude ne’ebé igreja selebra iha tinan 2019.

Bispo Dom Virgilio hateten tan katak momentu ne’e hanesan okaziaun ida atu universitáriu sira bele fó ekilíbriu ba sira-nia formasaun umana nian hodi sai sidadaun no kristaun di’ak ba sosiedade.

Fonte: Mídia Universidade Nacional Timor Lorosa'e (UNTL)

Notísia Hotu-Hotu >