MAP Reprezenta PM Halo Lansamentu Nasionál Sensus Agríkola Da-Huluk

Díli, 13 Agostu 2019 - Ministru Agrukultura no Peskas (MAP), Joaquim Martins, reprezenta Primeiru Ministru (PM) hodi halo lansamentu nasionál ba Sensus Agríkola Da-huluk iha rai-laran, ne’ebé akompaña husi Vise-Ministra no Ministra Finansas (MF) em Ezersísiu, Sekretáriu Estadu Formasaun Profisionál no Empregu (SEFOPE), reprezentante FAO iha Timor-Leste, reprezentante relijiózu sira nomós sosiedade sivíl iha Resintu MAP, Komoro.

MAP deklara iha nia diskursu sente onradu nu’udar reprezentante PM ba lansamentu refere nomós sensus ida ne’e sei fasilita MAP ho nia parsériu sira hotu hodi hetan dadus kredível ho padraun internasionál kona-ba setór Agrikultura.

Sensus refere sei ajuda Governu prepara planu dezenvolvimentu ho diak iha setór Agrikultura, Peskas, Pekuária no floresta. Tan ne’e, MAP husu entidades hotu nia apoiu no kolaborasaun hodi bele fornese dadus lolós tuir realidade iha terenu. Dadus husi sensus ne’e sei uza deit ba objetivu Estatístika no apoiu planu MAP.

Sensus ida ne’e sei realiza ho servisu koletivu entre MF no MAP iha nível polítika no téknika, no hetan apoiu husi FAO.

Fonte: Mídia Ministério da Agricultura e Pescas (MAP)

Notísia Hotu-Hotu >