PM Husu MNEK Atu Fó Tan Embaixadór Nain-13 Ne’ebé Seidauk Simu Posse Nia Informasaun Ba PR

Díli, 15 agustu 2019 - Prezidente Repúblika Francisco Guterres Lú Olo halo halo enkontru semanál ho Primeiru Ministru, Taur Matan Ruak iha Palásiu Prezidensiál Nicolau Lobato. Hafoin sorumutuk ho Prezidente Repúblika, Primeiru Ministru husu Ministru Negosius Estranjeiru no Kooperasaun atu fó tan informasaun ba Prezidénsia Repúblika relasiona ho tomada posse ba embaixadór sira.

Husi lista naran embaixadór na’in-16 ne’ebé Governu entrega ba Prezidente Repúblika, iha embaixadór na’in-tolu mak simu ona tomada posse. Relasiona ho lista naran embaixadór ne’ebé seidauk simu tomada posse, Primeiru Ministru informa:

“Iha balu tenke presiza haree, hadi’ak. Tanba ne’e mak husu Ministru Negosiu Estranjeiru fó tan informasaun ba Gabinete Prezidente Repúblika para depois haree preparativus saida mak sei halo atu tomada posse.”

Iha 13 agustu 2019, Prezidente Repúblika fó posse ba Embaixadór Timor-Leste ba Brazil, Estadus Unidus no Nova Zelandia. Embaixadór na’in-tolu simu tiha ona akordu husi nasaun sira ne’ebé sei hala’o sira-nia funsaun, iha 2018. Embaixadór na’in-rua hetan ona akordu tinan ida liu ona, ida fali liu ona fulan sia.

Xefe Estadu hasai Dekretu Prezidente Repúblika númeru 36/29, 37/2019 no 38/2019 hodi nomea Olímpico branco ba Embaixadór Timor-Leste Brasil, Isílio Coelho ba Embaixadór Estadus Unidus Amerika, Lisualdo Gaspar ba Embaixadór Nova Zelandia.

Fonte: Mídia Presidente da República (PR)

Notísia Hotu-Hotu >