PR Promulga Ona Primeira Alterasaun Lei RAEOA-ZEEMS

Dili, 15 Agostu 2019 - Prezidente Repúblika Francisco Guterres Lú Olo, ohin, promulga Primeira Alterasaun ba Lei 3/2014, 18 Juñu, ne’ebé kria Rejiaun Administrativa Espesiál Oecusse Ambeno no Estabelese Zona Espesiál Ekonomia Sosiál Merkadu Oecesse Ambeno no Ataúro.

Parlamentu Nasionál halo revizaun ba artigu rua husi lei refere relasiona ho nomeasaun no ezonerasaun Prezidente RAEOA-ZEESM husi Prezidente Repúblika ba Governu. Primeira alterasaun ba Lei 3/2014 aprova iha Parlamentu Nasionál iha 8 Jullu 2019.

Iha 29 Jullu 2019, Prezidente Repúblika envia Primeira Alterasaun ba Lei númeru 3/2014 hodi husu Tribunál Rekursu atu halo fiskalizasaun preventiva ba konstitusionalidade.

Iha 14 Agostu 2019, Tribunál Rekursu haruka Akordaun ba Prezidente Repúblika hodi deklara katak laiha inkonstusionalidade ba Primeira Alterasaun ba Lei 3/2014.

Ho nune’e, ohin, 15 Agostu 2019, Prezidente Repúblika promulga Primeira Alterasaun ba Lei númeru 3/2014.

Fonte: Mídia Presidente da República (PR)

Notísia Hotu-Hotu >