Governu Xina Entrega Ekipamentus Militár Ba Governu Timor-Leste

Díli, 20 Agostu 2019 - Governu Xina iha Kuarta-Feira (14/08) entrega ekipamentus militar nian ba governu Timor-Leste hodi fasilita serbisu Falintil-Forsa Defeza Timor-Leste (F-FDTL). Ekipamentus hirak ne’e mak hanesan botas rihun neen, kama andar iha rihun tolu atus neen, tenda militár hamutuk ualunulu, kaixa tau kilat fatin ho armariu atus ida ualunulu.

Ministru Defeza no Ministru Interior Interinu Filomeno da Paixão de Jesus hateten katak ida ne’e pedidu husi governu anterior nian no apoiu ida ne’e apoiu gratuitu.

“Ha’u haree apoiu ida ne’e avaliadu no baku ba osan karik hamutuk minimu mak 3 milloens, kuandu koalia valor komersiál bele to’o 5 milloes,”dehan Ministru Defeza bainhira remata serimónia entrega ekipamentu iha salaun Auditorium Ministériu Defeza Fatuhada.

Ministru apelu ba iha membru forsa sira atu utiliza sasan sira ne’e ho kuidadu tanba governu atende problema barak laos atende de’it mak forsa militár sira, simu oferta ida ne’e sorti bo’ot tebes tenke kuidadu no uza ho didi’ak.

“Ha’u apela ba komando kuandu iha buat ruma la kuidadu no estraga entaun tenke halo prosesu disiplinar obrigasaun,” tenik Ministru.

Iha fatin hanesan Xefe Estadu F-FDTL Maijór Jenerál Lere Anan Timur hatete, hodi forsa militár nian naran hato’o agrdesimentu ba governu Xina nia apoiu ba akipamentus lojístika nian, maibé relasaun entre repúblika popular Xina ho Republika demokrátika Timor-Leste laos relasaun bilaterál foun tamba bainhira Povu Timor hasoru situasaun difisil, Xina sempre fó apoiu solidariedade.

Serimónia entrega ekipamentu ofisializa husi Embaixadór Popular Xina mai Timor-Leste Xiao Jiangou no Ministru Defeza no Ministru Interior Interinu Filomeno da Paixão de Jesus, asisti husi estrutura F-FDTL, Komadante Jerál PNTL Komisáriu Faustino da Costa, Sekretáriu Estadu Protesaun Sivíl Alexandrino Xavier Araujo ho estrutura Ministériu Defeza nian.

Fonte: Mídia F-FDTL Falintil

Notísia Hotu-Hotu >