Governu Nova Zelándia Komprometidu Hodi Kontinua Fó Apoiu Ba TL Iha Setór Defeza

Díli, 26 Agostu 2019 - Ministru Defeza no Ministru Interior Interinu, Filomeno Paixão simu inkontru kortezia husi delegasaun ida husi Nova Zelándia. Inkontru refere xefia husi CMG Shaun Forgaty no akompaña husi Embaixadór Nova Zelándia mai Timor-Leste, Philip Hewit.

Iha inkontru ne’e, Delegasaun reiteira kompromisu governu Nova Zelándia nian hodi kontinua fó apoiu mai Timor-Leste iha setor defeza. Xefe Delegasaun ne’e informa ba Ministru kona-bá área sira ne’ebé governu Nova Zelándia komprometidu hodi fó apoiu ba Timor-Leste.

Ministru Defeza aproveita inkontru ne’e hato’o agradesimentu ba apoiu tomak ne’ebé durante tinan barak parseiru Nova Zelándia fó ba Timor-Leste, apoiu sira ne’e ajuda tebtebes dezenvolvimentu Timor-Leste iha setor defeza no seguransa nian.

Tersa-feira 27 Agostu 2019, Delegasaun ne’e sei hala’o inkontru anual nível bilateral ho Timor-Leste hodi diskuti hamutuk atividade sira ne’ebé durante ne’e parte rua hala’o. Inkontru bilateral defeza ne’e sai nudar espasu ida ba parte rua hodi diskuti hamutuk atividade parseria entre Timor-Leste no Nova Zelándia.

Fonte: Mídia Ministério da Defesa

Notísia Hotu-Hotu >