Lideransa RENETIL Husu Atu Hakoi Lucas Da Costa Iha Jardim Dos Herois Metinaro

Dili, 5 setembru 2019 - Portavoz RENETIL, Carlos da Silva ‘Shaky’ hasoru malu ho Prezidente Repúblika, Francisco Guterres Lú Olo, hodi husu atu Lucas da Costa nia mate-isin hakoi iha Jardim dos Herois, Metinaro.

Carlos Shaky hateten katak saudozu Lucas da Costa la’ós de’it nu’udar fundadór RENETIL maibé mós nu’udar konseitor no mestre ba ami tomak iha RENETIL bainhira luta hasoru okupasaun illegal iha Indonézia.

Saudozu Lucas da Costa, hanesan mós lideransa RENETIL sira seluk, tuir Mariano Sabino ‘Assanami’ hateten katak bainhira membru RENETIL seidauk rejista hotu, ninian lideransa sira sei la rejista. Tanba ne’e, lideransa RENETIL husu ba Prezidente Repúblika atu bele tetu hodi hakoi saudozu Lucas da Costa iha jardim dos herois, Metinaro.

Prezidente Repúblika hateten katak ema hotu rekoñese kontribuisaun saudozu ninian tanba ne’e RENETIL bele ko’alia ho Comissão Homenagem no haruka ninian rekomendasaun atu Xefe Estadu foti desizaun.

Fonte: Mídia Presidente da República (PR)

Notísia Hotu-Hotu >