Reitór Ofisializa Aula ba Mestradu iha Matemátika iha UNTL

Díli, 5 Setembro 2019 - Reitór Universidade Nacional Timor Lorosa’e (UNTL), Francisco Miguel Martins, ofisializa aula ba “Mestrado em Matématica para Professores” iha kuarta-feira, iha sala video konferénsia, iha Kampus Sentral UNTL.

Reitór UNTL hateten katak UNTL ofisializa programa refere ba formasaun profesór matemátika sira hodi eleva kualidade liuhusi nivel mestradu iha matemátika tamba alunu sira husi ensinu báziku to’o remata sekundaria ne’e matemátika fraku tebes.

Progama ne'e realiza tamba UNTL hetan apoiu profesór husi Universidade do Porto, Portugal ne'ebé sei kolabora mos ho UNTL-nia profesór sira ne’ebé doutoradu iha área matemátika. Progama ne’e hahú ona ho semestre zero no formaliza semestre foun ba turnu foun ba mestradu iha matematika nian.

Reitór esplika tan katak aleinde Mestradu iha Matemátik, área seluk ne’ebé dadaun la’o hela hanesan estudus nivel mestradu nian mak Direitu, Lingua Portugeza, Kontabilidade, Jestaun, Ekonomia i Jestaun Aplikada, Ekonomia Jestaun ba Negosiu, Servisu Sosiál, Administrasaun Edukasional, Polítika Jestaun i Avaliasaun Edukasional, Jestaun Sustentável Natureza e Ambiente, Enfermajen i Parteira, Medicina tropical no Estudu ba Páz I Konflitu.

Eventu ne’e partisipa husi proreitór no dekanu UNTL sira, no profesór konvidadu sira husi Universidade do Porto, no inklui mós profesór sira UNTL nian ho estudante sira.

Fonte: Mídia Universidade Nacional Timor Lorosa'e (UNTL)

Notísia Hotu-Hotu >