TR Planeia Atu Harii Rezidénsia Ba Juiz Sira Iha Baucau, Suai No Oecusse

Díli, 18 Novembru 2019 - Prezidente Tribunál Rekursu (TR), Deolindo dos Santos, informa ba Prezidente Repúblika, Francisco Guterres Lú Olo, kona-ba redistribuisaun juiz sira ba Tribunais iha munisípiu ne’ebé hala’o iha fulan Setembru. Hafoin fulan ida juiz sira halo adaptasaun, ohin loron serbisu Tribunais iha munisípiu la’o di’ak.

Juiz sira ne’e hahú hala’o nia kna’ar iha Tribunais iha Baucau, Suai, Oecusse no Díli. Tuir Prezidente Tribunál Rekursu katak tinan oin presiza atu harii rezidénsia ba juiz sira iha Baucau, Suai no Oecusse tanba laiha kondisaun hodi ezerse funsaun ho di’ak. Prezidente Tribunál Rekursu espera katak proposta ne’e bele aprova iha debate Orsamentu Jerál Estadu 2020.

Iha mós juiz na’in-lima ne’ebé tuir hela formasaun iha Portugal durante fulan-6, fulan tolu tuir formasaun teorika no fulan tolu seluk halo estajiu iha Tribunais. Juiz na’in-5 sei fahe ba Tribunal ida-idak atu bele iha koñesimentu di’ak liután.

Prezidente Tribunal Rekursu rekoñese katak presiza atu rekruta tan juiz, ofisiál justisa no funsionáriu. Relasiona ho atu aumenta númeru juiz nian, Deolindo dos Santos hato’o tiha ona pedidu ba Ministru Justisa atu loke konkursu ba formasaun juiz nian.

Formasaun ba juiz sira iha na’in-5 iha Portugal, formasaun teorika sei remata iha Dezembru depois sei hala’o estajiu iha Tribunal durante fulan 6 antes filamai Timor-Leste.

Fonte: Mídia Presidente da República (PR)

Notísia Hotu-Hotu >