Brunei Darussalam Kompromete Sei Fó Bolsu Estudu Iha Jestaun Konstrusaun Ba Timoroan

Díli, 18 novembru 2019 - Prezidente Repúblika, Francisco Guterres Lú Olo, simu iha audiénsia Embaixadór Brunei Darussalam iha Timor-Leste, Adnan Bin Haji M. Jaafar, ne’ebé iha inísiu sorumutu ne’e, hato’o saudasaun hosi Liurai Brunei Darussalam ba Xefe Estadu mós ba povu Timor-Leste ne’ebé iha loron-28 novembru fulan ne’e, sei selebra loron-independénsia ba dala-44.

Iha okaziaun ne’e mós, Embaixadór Adnan Bin Haji M. Jaafar relata kooperasaun sira ne’ebé nasaun rua hala’o no iha posibilidade atu hala’o iha futuru, hanesan iha area edukasaun, saúde, obras públikas no iha area transporte aereo.

Iha area edukasaun, Brunei kompromete sei kontinua fó bolus estudu ba timoroan sira hodi hasai kursu mestradu iha jestaun konstrusaun, ne’ebé fokaliu ba parseiria públiku privadu.

Relasiona ho área saúde no obras públikas, Embaixadór Brunei Darussalam haktuir iha ona koordenasaun atu realiza vizita estudu entre ofisias nasaun rua no ko’alia kona-ba transporte aero, Brunei Airlines, oras ne’e, halo hela estudu viabilidade hodi haree posibilidade semo mai Timor-Leste.

Fonte: Mídia Presidente da República (PR)

Notísia Hotu-Hotu >