Xefe Casa Civil Halo Abertura Ba Treinamentu Kombate Inséndiu

Díli, 18 Novembru 2019 - Xefe Casa Civil, Francisco Maria de Vasconcelos, akompaña hosi Xefe Casa Militar, Koronél António da Silva “Mau Kalo” no Sekretáriu Estadu Pretesaun sívil, Alexandrino de Araújo, halo abertura ba treinamentu kombate insénsiu ne’ebé realiza hosi Casa Militar Prezidénsia Repúblika.

Iha nia intervensaun Xefe Casa Civil husu atu partisipante sira bele aproveita oportunidade hodi aprende no bele kria komunikasaun di’ak atu nune’e bele fasilita asaun sira hodi kombate inséndiu iha futuru.

Iha sorin seluk, Xefe Casa Militar, Koronél António da Silva “Mau Kalo” hatete atividade ne’e, hanesan parte hosi planu Casa militar nian no nia fó hanoin, Casa Militar nia papel atu fó apoiu ba Prezidente Repúblika hala’o nia knaar nu'udar Komandante Supremu Forsa Armada. Iha ámbitu defeza no seguransa, Casa Militar mós halo seguransa ba Pesoal Prezidente Repúblika, nia familia inklui edifisiu, nune’e nia mós husu ba partisipante treinamentu inséndiu atu aprende ho di’ak.

Enkuantu Sekretáriu Protesaun Sivil, iha nia intervensaun esplika ba partisipantes sira kona-ba vertente tolu importante iha “seguransa integradu”, tuir Lei Seguransa Nasional mak hanesan: Defeza Nasional (knar F-FDTL), Seguransa Interna (knar PNTL) no Protesaun Sivil.

Formasaun inséndiu sei realiza durante loron 16 no materia ne’ebé sei fó mak formasaun iha Kombate Insendiu Urbana, 1o Intervensaun Kontra Inséndiu, 1o Sekoru, Resgatu no salvamentu no ikusliu, mak Prátika.

Total partisipante iha formasaun ne’e ema hamutuk 31 hosi Casa Militar no treinadór sira ba formasaun mai hosi Protesaun Sivil/Bombeirus.

Fonte: Mídia Presidente da República (PR)

Notísia Hotu-Hotu >