Timor-Leste Kontinua Esforsu-An Atu Garante Direitu Ba Ema Ho Defisiénsia

Díli, 18 Novembru 2019 - Ministra Solidariedade Sosiál no Inkluzaun (MSSI), Armanda Berta no Vise-Ministra Signi Verdial, akompaña hosi Diretór jerál no Xefe Gabinete, simu vizita Sekretária Nasionál Direitu ba Ema ho Defisiénsia hosi Brazíl, Ana Paula Nedavaska, no akompaña hosi Embaixadór Brazíl ba Timor-Leste, Aldemo Garcia.  Enkontru ne’e hala’o iha sala reuniaun Gabinete MSSI, Caicoli.

Ministra Armanda Berta hateten, “Liuhosi vizita ne’e, MSSI mós informa katak Timor-Leste kontinua esforsu-an atu garante direitu ba ema ho defisiénsia. Ita mós kontinua atu garante ema ho defisiente nia direitu no partilla informasaun esperiénsia Timor-Leste nia tratamento ba ema ho defisiente.”

Ministra MSSI akresenta katak “Governu Timor-Leste liuhosi MSSI, la’os serbisu mesak, maibé servisu ho Ministériu tomak atu haree ba ema ho defisiénsia. Ita haree ema ho defisiénsia iha ita nia Nasaun importante tebes, tanba ne’e MSSI tau matan hela nomós iha tinan 2020, sei kria konsellu nasionál ba ema ho defisiénsia nune’e hodi garante direitu tomak iha seitór hotu no iha dezenvolvimentu nasionál.”

Atu garante direitu ba ema ho defisiénsia, MSSI esforsu hela ho liña ministerial atu tau-matan hotu ba sira liuhosi setór edukasaun, saúde no infraestutura. Nune’e iha OJE 2020, MSSI Prevee orsamentu millaun $2.

Fonte: Ministério da Solidariedade Social e Inclusão (MSSI)

Notísia Hotu-Hotu >