Koronél Coliati: Rekrutamentu Membru F-FDTL Jerál Ba Timoroan Tomak

Palásiu Prezidensiál Nicolau Lobato, Dili, 20 Novembru 2019 - Prezidente Repúblika Francisco Guterres Lú Olo hala’o sorumutu semanál ho Xefe Estadu Maior Generál Falintil Forsa Defeza Timor-Leste (F-FDTL), Majór-Jenerál Lere Anan Timur, akompaña hosi nia Vise, Brigadeiru Jenerál, Falur Rate Laek no Xefe Estadu Maior, Koronél Calisto Santos “Coliati”.

Iha enkontru ne’e, Majór-Jenerál Lere aleinde atualiza situasaun defeza-seguransa rai-laran ne’ebé nia konsidera hakmatek, relata mós servisu sira F-FDTL nian liuliu relasiona ho planu rekrutamentu membru forsa F-FDTL iha tinan-2020.

Xefe Estadu Maior, Koronél Calisto Santos “Coliati”, ne’ebé lidera prosesu rekrutamentu ne’e hateten F-FDTL sei fó prioridade ba veteranus nia oan. “Ida ne’e la signifika katak ne’e veteranu nia oan de’it mak sei tama rekruta. Rekrutamentu ne’e jerál ba timoroan tomak, feto ka mane ne’ebé priense kritérius sira ne’e mak sei tama ba tropa”, subliña Koronél Coliati, ne’ebé garante F-FDTL sei apoiu nafatin Polísia Nasionál Timor-Leste hodi mantein lei no ordem iha rai-laran.

Fonte: Mídia Presidente da República (PR)

Notísia Hotu-Hotu >