Palásiu Prezidensiál Nicolau Lobato, Dili, 20 Novembru 2019 - Prezidente Repúblika, Francisco Guterres Lú Olo hala’o enkonkontru mensál ho Prezidente Parlamentu Nasionál, Arão Noé, ne’ebé iha okaziaun ne’e aleinde relata servisu sira parlamentu nian, informa mós mudansa data ba debate Orsamentu Jerál Estadu 2020, ne’ebé tuir loloos hahu ohin.

Nia hateten mudansa ne’e akontese “tanba komisaun C seidauk konklui sira-nia relatóriu”, nune’e, “konferensia líderes bankada muda fali ba 25 novembru. Debate espesialidade loron-29 novembru to’o 12 dezembru, hotu final-global”. No iha loron 13 dezembru, “se komisaun C konklui redasaun-final iha 13 dader, iha lokraik, bele haruka kedas mai S.E. Prezidente Repúblika”, afirma Arão Noe.

Ba imprensa, hatan kona-ba Xefe Estadu nia hanoin, Prezidente Parlamentu Nasionál ne’e heteten: “Apresiasaun Señor Prezidente-da-Repúblika nia katak Orsamentu Jerál Estadu ne’e, orsamentu ba interese nasionál. Presiza debate ho klean, ho didiak. (...) Depois Prezidente dehan, orsamentu ne’e boot, atu reduz karik, reduz ho hanoin didi’ak para labele iha impaktu ba prioridades sira ne’ebé importante. (...) Diferensa ideias iha debate ne’e normal, importante ita haree ba kontiudu ho didi’ak”, Arão Noe haktuir Prezidente Francisco Guterres Lu Olo nia liamenon.

“Ha’u hanoin asuntu ida ne’e ami konsidera. Agora kabe ba deputadu sira. Hanesan ha’u dehan bebeik ona, reduz ka aumenta orsamentu ne’e kompetensia deputadu sira-nian liuhosi proposta”, esplika Prezidente Parlamentu Nasionál.

Arão Noe informa ba Xefe Estadu katak oras ne’e iha meja Parlamentu Nasionál iha Proposta Lei Orsamentu Jerál Estadu 2020 no Projetu lei haat maka hanesan: lei anti korupsaun, lei poder lokál, lei eleisaun parlamentu local no lei kódigu miñeiru.