MOP Halo Inspesaun Ba Servisu Konstrusaun Estrada Nasionál Baukau-Vikeke

Venilale, 04 Jullu 2020 - Ministru Obras Públikas (MOP), Salvador Pires, iha Sábadu kotuk halo inspesaun ba projetu konstrusaun estrada nasionál hosi munisípiu Baukau ba munisípiu Vikeke ne’ebé daudauk ne’e hahú servisu iha Lot 1 hosi munisípiu Baukau ba postu administrativu Venilale.

Prosesu libertasaun rai iha konstrusaun estrada nasionál Baukau-Vikeke lot 1 hosi Baukau ba Venilale daudauk ne’e kompañia konstrutór no supervisor hahú halo libertasaun rai iha parte Berkoli, postu administrativu Venilale nian tanba prosesu indiminizasaun la’o ona no fó ona kompesasaun ba komunidade afeitadu liuliu ba ai-horis no rezidénsia ne’ebé afeitadu hosi konstrusaun refere.

Lot 1 nian iha área balun seidauk liberta hanesan hosi Baukau Vila ba Buibau nian parte balun, suku Uailili, suku Gariuai to’o iha Fatumaka seidauk iha prosesu libertasaun rai ba konstrusaun estrada nasionál tanba sei iha prosesu identifikasaun no negosiasaun ho komunidade hodi fó indiminizasaun ba komunidade nia ai-horis no rezidénsia ne’ebé hetan afeitadu.

Iha inspesaun ne’e, Ministru hateten katak orienta Unidade Manajementu Projetu (PMU) hamutuk ho kompañia konstrutór no supervisór hodi aprosima ho autoridade lokál no komunidade iha área afeitadu ne’ebé daudauk ne’e seidauk halo libertasaun ba rai hodi prosesa lalais indiminizasaun, nune’e konstrusaun estrada nasionál ne’e bele la’o ho di’ak.

Fonte: Mídia Ministério das Obras Pública (MOP)

Notísia Hotu-Hotu >