Kompañia Mie Sedap Fó Apoiu Umanitária Supermie Kaixa 270 Ba Komandu PNTL

Dili, 07 Jullu 2020 - Komandu Polísia Nasional Timor-Leste (PNTL) hetan apoiu Supermie Mie Sedap hamutuk kaixa 270 hosi Kompañia Mie Sedap iha Timor-Leste. Apoiu umanitária ne’e hanesan meiu ida atu tulun membru PNTL sira ne’ebe hala’o servisu iha terenu durante kombate surtu Covid-19 iha Timor-Leste.

Komandante Komandu Administrasaun PNTL Superintendente Xefe José Soares ne’ebé reprezenta Komandu iha serimonia simu apoiu ne’e hateten, lori Komandu nia naran hato’o agradesimentu ba apoiu ne’ebe mak fó hosi kompañia, atu bele tulun membru sira wainhira hala’o servisu loron no kalan iha terenu.

José Soares afirma tan katak liuhosi apoiu ne’e sei bele hametin liu tan amizade entre PNTL ho Kompañia, tanba knaar PNTL nian mak atu garante seguransa ba ema hotu no la fihir ba sidadaun estranjeiru ka sidadaun Timor. Maibé importante atu ema hotu iha Timor-Leste bele sente seguru wainhira hala’o atividade.

Iha fatin hanesan, Country Manager Kompañia Mie Sedap iha Timor-Leste Henny Kurniawan iha ninia lia menon hateten objetivu hosi apoiu ne’e mak hakarak ajuda instituisaun PNTL iha tempu pandemia ida ne’e iha ne’ebé PNTL sempre hala’o knaar iha tempu loron no kalan. Apoiu hirak ne’e hanesan faze dahuluk ne’ebé sei fó supermie hamutuk 270 no faze daruak nian sei oferese tan 730.

Fonte: Mídia Polícia Nacional de Timor-Leste (PNTL)

Notísia Hotu-Hotu >